കുഴിമാടം

 

 

മറന്നു വച്ച  കൊടുവാളെടുക്കാന്‍     തിരിച്ചു  വന്ന   അയാളെ ആരോ  വെട്ടിക്കൊന്നു .

ശേഷം    രക്തസാക്ഷിയുടെ  പുതപ്പ്   പുതപ്പിച്ചു കിടത്തി  . ആകിടപ്പില്‍   റീത്ത്  വെക്കുന്നവരുടെ   മുഖത്തെ  ദുഖഭാവവും  ഉള്ളിലെ  സന്തോഷവും   കണ്ടു.

 അയാളെ  വെട്ടിക്കൊന്നവരെ  അടുത്തുവിളിച്ചു  ഒളിവില്‍  പറഞ്ഞയച്ച  നേതാവിന്റെ   കണ്ണില്‍  നിന്നു രണ്ടു  തുള്ളി   കണ്ണീര്‍ വീണു.  അത്   ‌ വെട്ടുകൊണ്ട  ഭാഗത്ത് തന്നെ    വീണപ്പോള്‍  അയാള്‍ക്ക്‌    വല്ലാതെ   എരിഞ്ഞു.

 

പിന്നെ  

ജീവിക്കുന്നു   ഞങ്ങളിലൂടെ എന്ന       മുദ്രാവാക്യവും    മുഴക്കിക്കൊണ്ട്  അയാളെ      കുഴിമാടത്തിലേക്ക്  എടുത്തപ്പോള്‍   വീടിന്റെ  അകത്തളം  തേങ്ങുന്നതു   അന്നാദ്യമായി  അറിഞ്ഞു .

ഇനി  കുഴിമാടം , പുഷ്പാര്‍ച്ചന , രക്തസാക്ഷി  ദിനാചരണം. പ്രാദേശിക  സമ്മേളനത്തിലെ  നഗരിയുടെ  പേര്  അങ്ങനെ  പാര്‍ട്ടി നടപ്പാചാരങ്ങള്‍ക്ക്  വിധേയനാക്കപ്പെടും .നടക്കട്ടെ.

ചോരമണ മുള്ള കൈകള്‍  തന്നെ   എല്ലാം  ചെയ്യട്ടെ .

എന്നാല്‍   കുഴിമാടത്തിലെ  ശിലാഫലകത്തില്‍  മകന്‍  എഴുതി വച്ച  കുറിപ്പ്   ഇന്നുവരെ  കേട്ടതില്‍  വച്ച്  ഏറ്റവും  വലിയ    സത്യവാചകമെന്നു അയാള്‍ക്ക്‌    തോന്നി  . അതിങ്ങനെ  ആയിരുന്നു   " വെട്ടുകൊണ്ടു  മരിക്കാന്‍  തയ്യാറാവുക   കൊടുവാള്‍  വെച്ച് മറക്കുന്നവര്‍"  

മാനവികത

മാനവികത എന്നെയും
വിളിച്ചുണര്‍ത്താന്‍ വന്നു
അവര്‍ക്കതിനു കഴിഞ്ഞില്ല
മുടികൊണ്ട്‌ മുഖം മറച്ചു
ഞാനവരെ പറ്റിച്ചു .

 

               

                                           

                                              താടിയും ബീഡിയും

 

താടിക്ക് തീ പിടിച്ചു
തീ കണ്ടു താടി ചോദിച്ചു
ബീഡി യുണ്ടോ സഖാവേ
ഒരു താടിയെടുക്കാന്‍ .
ഇനി
താടിയും ബീഡിയും
കൂടി കാശിക്കു പോയാല്‍
ആരാണ് ആദ്യമെത്തുക
എന്നറിഞ്ഞാല്‍ മതി .

 

 

 

ചതുരം

കളങ്ങള്‍  വരഞ്ഞു   

ചതുര പെട്ടികള്‍  തീര്‍ത്തു 

ചുറ്റും  

ഭിത്തികള്‍  ഉയര്‍ത്തി  

കണ്ണിനും   മനസ്സിനും 

കാതിനും ഇനി  

ചാടിക്കടക്കാന്‍  വഴിയേതുമില്ല ഇനി

ശാന്തമായൊന്നുറങ്ങട്ടെ.

എന്നിട്ടും  

ശാന്തികിട്ടാത്ത 

മസ്സിനെ  ശാന്തമാക്കാന്‍  

വേറെ വല്ല   വഴിയുമുണ്ടോന്നു  

ഗൂഗിളില്‍  തിരഞ്ഞു 

അവിടെ  

തെരുവ്  

മനുഷ്യന്‍  ശന്തമായുറങ്ങുന്ന   

ചിത്രം  മാത്രം   അയാള്‍  കണ്ടില്ല .

അശാന്തരുടെ കലഹം

പൈതലുറങ്ങും നേരവും

എന്റെ തെരുവോരവും

ഞാന്‍ നിനക്ക് തന്നു

ഒരിറ്റു വെളിച്ചം കെട്ടുപോയ രാത്രികളും

ഞാന്‍ നിനക്ക്തന്നു 

ഇനിയെന്റെ വാക്കുകളും

നീ മുറിച്ചെടുത്തു കൊള്‍ക

ഇനിയെന്റെ ചുടു നിശ്വാസവും

നീര്‍ വറ്റിയ വിതുമ്പലും

നിന്റെ കാല്‍ക്കീഴിലിട്ടെരിച്ചു കൊള്‍ക

ഇനിയുമെന്റെ പറയാത്ത വാക്കുകള്‍

കഴുമരമേറ്റുക

ഒടുവില്‍ നീ എന്റെ നാവരിഞ്ഞു

നായ്ക്കള്‍ക്കെറിയുക

നിന്റെ തലമുറകള്‍

തെരുവിലെ പുഴുവായിടുമ്പോള്‍

നീ ഉന്മാദ ചിത്തനായ് രമിച്ചു കൊള്‍ക

തെരുവിനെ അശാന്തമാക്കി  
ഹൃദയങ്ങള്‍  കലുഷമാക്കി  ഒടുവില്‍

നീ നേടിയതെന്ത്  .

മുടിയുടെ നല്ല കാലം

മുടിയുടെ നല്ല    കാലം വന്നു 
കേശ ജലത്തിനും  വന്നു  നല്ല  കാലം  
ആഗോള  മുടിവാണിഭം  പൊടിപൊടിച്ചു
ആളുകള്‍  മുടിക്കുവേണ്ടി  ജീവിച്ചു
മുടിക്കുവേണ്ടി  പൊരുതി  
മുടിക്കുവേണ്ടി  മാത്രം  മരിച്ചു  .
അതിനിടയില്‍  ശ്വാസം കിട്ടാതെ
എന്തോ  ഒന്ന്  പിടഞ്ഞു  നിലവിളിച്ചു
അതാരും  കണ്ടില്ല .





 സ്വപ്നം 

പുരോഹിതന്‍  സ്വപനം  കണ്ടു 
അങ്ങനെ  വിശ്വാസികള്‍ക്ക്  
പുണ്ണ്യ മെടുക്കാന്‍  
പുണ്ണ്യ കേന്ദ്രവും   തുറന്നു .


അതിനു  ശേഷം    ഒരിക്കലും 
വിശ്വാസികള്‍ക്ക്   പുണ്ണ്യ മെടുക്കാന്‍  
ത്യാഗമൊന്നും  ചെയ്യേണ്ടി  വന്നിട്ടില്ല.

പ്രളയം

                                       
സാക്ഷി  കാലത്തോടൊപ്പം  നിലവിളിച്ചു 
അപ്പോഴും  അവര്‍  പറഞ്ഞു  
ഇത്  നിലവിളിയല്ല  
താരാട്ടാണെന്ന് .
അങ്ങനെ  കാലവും  
സാക്ഷിയും  മഹാ പ്രളയത്തില്‍ 
മുങ്ങിപ്പോയപ്പോള്‍ 
നിലവിളിയാണെന്ന് 
 തിരിച്ചറിയാന്  ആരുമില്ലായിരുന്നു  .






യൂദാസ്   
   
ഒറ്റിക്കൊടുത്തു   മരവിച്ച 
അയാളുടെ മനസ്സിനെ  
മുപ്പതു   വെള്ളിക്കാശ്  ഇന്നും  വെറുതെ  വിട്ടില്ല .
അതിനാല്‍
ഇന്ന് രാത്രിയും    ഒറ്റിയ വെള്ളിക്കാശിന്റെ   
തണലില്‍  
യൂദാസ്    സുഖമായുറങ്ങി  .

അവകാശം

ചോര  കൊതിച്ചവര്‍ക്കുവേണ്ടി  ചോര്‍ത്തിയെടുക്കാന്‍
നിന്ന് കൊടുത്തു.
കഴുമരത്തില്‍  തൂക്കിയിടാന്‍  
കൊതിച്ചവര്‍ക്ക്  
കഴുത്തു   നീട്ടികൊടുത്തു .
ഇനിയുമെന്തു  വേണമെന്ന്   ചോദിച്ചു 
മുട്ടിലിഴഞ്ഞവര്‍ക്ക്  മാത്രമാണത്രെ 
സ്വാതന്ത്ര്യം  . 
അവര്‍ക്കുമാത്രമാണത്രേ  അവകാശം  
അതിനാല്‍  തേയുന്നത്  വരെ  മുട്ടിലിഴയുകതന്നെ .  





പേര്

പേര്  തന്നെ  അവരുടെപേടി   
പേടി മാറ്റാന്‍  
വഴിയുണ്ട്. 
പേരുള്ളവരുടെ  
പെരിലെന്തെന്നു  
ചോര്‍ത്തി  നോക്കുക .
എന്നാല്‍  
പേരുള്ളവരുടെ  പേടി 
മാറ്റാന്‍  ആരുണ്ട്‌  ? 

ലൌ ജിഹാദും കേരള മാധ്യമങ്ങളുടെ ആഘോഷവും .

അന്ന് 
ലൌ  ജിഹാദികള്‍   കാമ്പസുകളില്‍  
പ്രണയാമ്പുകളെയ്തു   വീഴ്ത്തിയത്   നേരില്‍  കണ്ടിരുന്നു  
സഭകളും  കരയോഗവും  പരിവാരവും    ലേഖകന്മാരും  
ആ  കാഴ്ച  കണ്ടു   ഞെട്ടി  വിറച്ചു  .
നടുക്കുന്ന   റിപ്പോര്‍ട്ടുകള്‍  ചാര്‍ട്ടുകള്‍  
ചാനലുകള്‍   ചര്‍ദ്ദിച്ചു  കൂട്ടി 
പിന്നീടത്‌     ചര്‍ച്ച  ചെയ്തുറപ്പിച്ചു
പത്രങ്ങള്‍  അക്ഷരങ്ങള്‍ക്ക്   തീകൊടുത്തു  .

ഇന്ന്  

വലിയൊരു   നുണ  ബോംബിനെ  ആഘോഷമാക്കിയവര്‍   
റിപ്പോര്‍ട്ടുകളും   കണക്കു  നിരത്തിയ  ചാര്‍ട്ടുകളും  
കൊണ്ട്      ഒരു  സമുദായത്തെ   മുള്‍മുനയില്‍  നിര്‍ത്തിയവര്‍  
ഏതു  മാളത്തിലാണ്.?
അവര്‍ക്ക്   ഒരു  ബാധ്യത  ഇല്ലേ ?
തെറ്റും  ശരിയും  അന്വേഷിക്കാനുള്ള   മാധ്യമ  ധര്‍മം  നശിപ്പിച്ചതിന്  
കേരളത്തോട്    മാപ്പ്  പറയാന്‍ .