ചൂടുള്ള പ്രവാസങ്ങള്‍

ചൂടുള്ള പ്രവാസങ്ങള്‍ 

കുഞ്ഞായിരിക്കുമ്പോള്‍

വെയില്  കൊള്ളാന്‍ പോയ

എന്നെ ഉമ്മ   ശകാരിച്ചു  

പ്രവാസിയാവാന്‍  പോയ എന്നെ   

ഉമ്മ  ശകാരിച്ചില്ല     

പക്ഷെ  പ്രവാസത്തിന്റെ  വെയിലിനു  

എത്ര  ചൂടുണ്ടെന്നു 

എന്റെ  ഉമ്മാക്ക്  അറിയില്ലായിരുന്നുവല്ലോ

തനിച്ചല്ല നീ

തനിച്ചല്ല നീ
ഓരോ ഇടനാഴികളും
പിന്നിടുമ്പോള്‍ നിഴലുകളുടെ ആരവം
കേള്‍ക്കുന്നവര്‍ അന്നങ്ങനെ  പറഞ്ഞിരുന്നു 
അതെ തനിച്ചല്ല ഞാന്‍
പിന്തിരിഞ്ഞു  നോക്കുമ്പോള്‍
എന്നെ പെടിപ്പിച്ചിരുന്ന നിഴലുകള്‍
എനിക്ക് ജയ് വിളിക്കുന്നു
അവരെ പറഞ്ഞിട്ട് കാര്യമില്ല
എന്റെ കിരീടവും ചെങ്കോലും
പടിയിറങ്ങുന്ന നേരം വരുംവരെ  
അവര്‍ കാത്തിരിക്കും   
എന്റെ കോലം കത്തിക്കാന്‍ .

ഉറങ്ങിപ്പോയി

                                                    




അക്ഷരം കീ ബോര്‍ഡ് തന്നു
പക്ഷെ വാക്ക് തന്നില്ല
വാക്ക് ഞാന്‍ നിര്‍മിച്ചു
പക്ഷെ ആശയം  കണ്ടില്ല 
ആശയം പുസ്തകങ്ങളില്‍  കണ്ടു 
പക്ഷെ തിരിച്ചറിയാന്‍ കഴിഞ്ഞില്ല
തിരിച്ചറിവ് ലോകം തന്നു
പക്ഷെ ഇടപെടാന്‍ കഴിഞ്ഞില്ല
ഇടപെടുന്നവര്‍ വാതിലില്‍ തട്ടിവിളിച്ചു 
പക്ഷെ അപ്പോള്‍   ഞാന്‍ ഉറങ്ങിപ്പോയിരുന്നു .

ചീന്തിയെടുത്ത ജീവിതങ്ങള്‍

ചീന്തിയെറിഞ്ഞ  ജീവിതങ്ങള്‍  ഉറങ്ങുന്ന   

തെരുവിലെ  ചവറുകൂനയില്‍ 

ആരോ  പൊതിഞ്ഞുവച്ച  ചാരിത്ര്യത്തില്‍ 

ചോരതുടിപ്പുകള്‍  കണ്ടു  .

 

ചവറുകൂനയിലെ   ചോരത്തുടിപ്പിന്റെ   

സദാചാരം  തിരഞ്ഞു

പോയവര്‍ക്ക്  കാണാന്‍  കഴിഞ്ഞതോ

സ്വന്തം  പ്രതിരൂപം  തന്നെ .

ചവറിനേക്കാള്‍ 

നാറിയ   സദാചാരക്കാരുടെ

വേദാന്തം  കേട്ട്

അന്ന്  ചവറുകൂനപോലും  മൂക്കുപൊത്തി .

കുഴിമാടം

 

 

മറന്നു വച്ച  കൊടുവാളെടുക്കാന്‍     തിരിച്ചു  വന്ന   അയാളെ ആരോ  വെട്ടിക്കൊന്നു .

ശേഷം    രക്തസാക്ഷിയുടെ  പുതപ്പ്   പുതപ്പിച്ചു കിടത്തി  . ആകിടപ്പില്‍   റീത്ത്  വെക്കുന്നവരുടെ   മുഖത്തെ  ദുഖഭാവവും  ഉള്ളിലെ  സന്തോഷവും   കണ്ടു.

 അയാളെ  വെട്ടിക്കൊന്നവരെ  അടുത്തുവിളിച്ചു  ഒളിവില്‍  പറഞ്ഞയച്ച  നേതാവിന്റെ   കണ്ണില്‍  നിന്നു രണ്ടു  തുള്ളി   കണ്ണീര്‍ വീണു.  അത്   ‌ വെട്ടുകൊണ്ട  ഭാഗത്ത് തന്നെ    വീണപ്പോള്‍  അയാള്‍ക്ക്‌    വല്ലാതെ   എരിഞ്ഞു.

 

പിന്നെ  

ജീവിക്കുന്നു   ഞങ്ങളിലൂടെ എന്ന       മുദ്രാവാക്യവും    മുഴക്കിക്കൊണ്ട്  അയാളെ      കുഴിമാടത്തിലേക്ക്  എടുത്തപ്പോള്‍   വീടിന്റെ  അകത്തളം  തേങ്ങുന്നതു   അന്നാദ്യമായി  അറിഞ്ഞു .

ഇനി  കുഴിമാടം , പുഷ്പാര്‍ച്ചന , രക്തസാക്ഷി  ദിനാചരണം. പ്രാദേശിക  സമ്മേളനത്തിലെ  നഗരിയുടെ  പേര്  അങ്ങനെ  പാര്‍ട്ടി നടപ്പാചാരങ്ങള്‍ക്ക്  വിധേയനാക്കപ്പെടും .നടക്കട്ടെ.

ചോരമണ മുള്ള കൈകള്‍  തന്നെ   എല്ലാം  ചെയ്യട്ടെ .

എന്നാല്‍   കുഴിമാടത്തിലെ  ശിലാഫലകത്തില്‍  മകന്‍  എഴുതി വച്ച  കുറിപ്പ്   ഇന്നുവരെ  കേട്ടതില്‍  വച്ച്  ഏറ്റവും  വലിയ    സത്യവാചകമെന്നു അയാള്‍ക്ക്‌    തോന്നി  . അതിങ്ങനെ  ആയിരുന്നു   " വെട്ടുകൊണ്ടു  മരിക്കാന്‍  തയ്യാറാവുക   കൊടുവാള്‍  വെച്ച് മറക്കുന്നവര്‍"  

മാനവികത

മാനവികത എന്നെയും
വിളിച്ചുണര്‍ത്താന്‍ വന്നു
അവര്‍ക്കതിനു കഴിഞ്ഞില്ല
മുടികൊണ്ട്‌ മുഖം മറച്ചു
ഞാനവരെ പറ്റിച്ചു .

 

               

                                           

                                              താടിയും ബീഡിയും

 

താടിക്ക് തീ പിടിച്ചു
തീ കണ്ടു താടി ചോദിച്ചു
ബീഡി യുണ്ടോ സഖാവേ
ഒരു താടിയെടുക്കാന്‍ .
ഇനി
താടിയും ബീഡിയും
കൂടി കാശിക്കു പോയാല്‍
ആരാണ് ആദ്യമെത്തുക
എന്നറിഞ്ഞാല്‍ മതി .

 

 

 

ചതുരം

കളങ്ങള്‍  വരഞ്ഞു   

ചതുര പെട്ടികള്‍  തീര്‍ത്തു 

ചുറ്റും  

ഭിത്തികള്‍  ഉയര്‍ത്തി  

കണ്ണിനും   മനസ്സിനും 

കാതിനും ഇനി  

ചാടിക്കടക്കാന്‍  വഴിയേതുമില്ല ഇനി

ശാന്തമായൊന്നുറങ്ങട്ടെ.

എന്നിട്ടും  

ശാന്തികിട്ടാത്ത 

മസ്സിനെ  ശാന്തമാക്കാന്‍  

വേറെ വല്ല   വഴിയുമുണ്ടോന്നു  

ഗൂഗിളില്‍  തിരഞ്ഞു 

അവിടെ  

തെരുവ്  

മനുഷ്യന്‍  ശന്തമായുറങ്ങുന്ന   

ചിത്രം  മാത്രം   അയാള്‍  കണ്ടില്ല .

അശാന്തരുടെ കലഹം

പൈതലുറങ്ങും നേരവും

എന്റെ തെരുവോരവും

ഞാന്‍ നിനക്ക് തന്നു

ഒരിറ്റു വെളിച്ചം കെട്ടുപോയ രാത്രികളും

ഞാന്‍ നിനക്ക്തന്നു 

ഇനിയെന്റെ വാക്കുകളും

നീ മുറിച്ചെടുത്തു കൊള്‍ക

ഇനിയെന്റെ ചുടു നിശ്വാസവും

നീര്‍ വറ്റിയ വിതുമ്പലും

നിന്റെ കാല്‍ക്കീഴിലിട്ടെരിച്ചു കൊള്‍ക

ഇനിയുമെന്റെ പറയാത്ത വാക്കുകള്‍

കഴുമരമേറ്റുക

ഒടുവില്‍ നീ എന്റെ നാവരിഞ്ഞു

നായ്ക്കള്‍ക്കെറിയുക

നിന്റെ തലമുറകള്‍

തെരുവിലെ പുഴുവായിടുമ്പോള്‍

നീ ഉന്മാദ ചിത്തനായ് രമിച്ചു കൊള്‍ക

തെരുവിനെ അശാന്തമാക്കി  
ഹൃദയങ്ങള്‍  കലുഷമാക്കി  ഒടുവില്‍

നീ നേടിയതെന്ത്  .