സ്വാതന്ത്ര്യം

 സ്വാതന്ത്ര്യം

താഴ്‌വരയിലെ  
കൂട്ടക്കുഴിമാടങ്ങള്‍ക്ക്  
മുകളിലായിരുന്നു 
സ്വാതന്ത്ര്യം
 
കൊന്നു
കുഴിച്ചു
മൂടാനുള്ള 
സ്വാതന്ത്ര്യം 

            മനുഷ്യാവകാശം   

         തോക്കില്‍  നിറച്ചതും 

         കാഞ്ചി വലിച്ചപ്പോള്‍  

         ചീറിപ്പാഞ്ഞു  

         നെഞ്ച്  തുളച്ചതും 

     മനുഷ്യാവകാശം  പുരട്ടിയ  

      ഉണ്ടകള്‍  തന്നെ .

         എന്നിട്ടും  പറയുന്നു 

                                                               മനുഷ്യാവകാശ 

                                                               ലംഘനമെന്ന് .

ചിക്കന്‍ ഗുനിയ

ചിക്കന്‍ ഗുനിയ 

അധികാരം   സിംഹാസനത്തിലിരുന്നു  മീശപിരിച്ചു

ഈഡിസ്‌ കൊതുക്   സിംഹാസനത്തിനു  പിന്നില്‍  മുട്ടയിട്ടു

അങ്ങനെയാണ്  അധികാരത്തിനു  ചിക്കന്‍ ഗുനിയ  വന്നതും 

അണ്ണാ  ഹസാരെയേ  അറസ്റ്റു  ചെയ്യേണ്ടി വന്നതും 

             
                               
                                              

 

പെരുച്ചാഴികള്‍
വാല്‍മാക്രികള്‍ പോക്കാചിതവളകളെ  ഉപരോധിച്ചു 
അങ്ങനെ  കുളം  സ്വതന്ത്രമായി
അപ്പോഴും   പെരുച്ചാഴികള്‍   കുളം തുരക്കുന്നുണ്ടായിരുന്നു 
നീര്‍ കോലികളുടെ  അത്താഴം  മുടങ്ങിയപ്പോള്‍  
                               മാത്രമാണ്  പെരുച്ചാഴിയെ  പിടിക്കാന്‍ 
                               കെണി ഒരുങ്ങിയത് . 

പ്രകടന പത്രിക

രാജാവില്ലാത്ത  കൊട്ടാരം 

കാര്യസ്ഥന്‍  മന്ത്രിയുടെ  ശകുനം മുടക്കി

തോഴി  റാണിയെ  വഴിമുടക്കി

കിങ്കരന്മാര്‍  അന്തപ്പുരത്തില്‍   പള്ളിയുറങ്ങി

വിദൂഷകന്റെ  ചുണ്ടുകള്‍  താഴിട്ടുപൂട്ടി

ഖജനാവ്  വിശന്നു  നിലവിളിച്ചു

പ്രജകള്‍ കൊട്ടാരം  കയ്യടക്കി

അങ്ങനെ പിന്നീട്

കല്‍തുറുങ്ക് കൊട്ടാരമാക്കി . 

പ്രകടന പത്രിക

മുന്നണി ഭരണം  തുടങ്ങി

പ്രകടന പത്രിക  ഇറങ്ങി ഓടി

അഞ്ചു വര്ഷം 

ഒളിവില്‍ കഴിഞ്ഞ  പത്രിക

തിരിച്ചു  വന്നിട്ട്  നേതാക്കളോട് ചോദിച്ചു

ഓര്‍മ്മയുണ്ടോ  ഈ മുഖം ?

നേതാക്കളപ്പോള്‍   ആസനത്തില്‍ മുളച്ച 

ആലിന്  വെള്ളമൊഴിക്കുകയായിരുന്നു .

തെളിവ്

തെളിവ്

താടിയും  തൊപ്പിയുമുണ്ടായിരുന്നു   

കൃത്യമായി  നമസ്കരിക്കാനും  പോകുന്നത് കണ്ടു

പിന്നെ  ഇതില്‍ കൂടുതല്‍

തെളിവ്  ഞാന്‍  അന്വേഷിച്ചില്ല

ഉടനെ  വന്നു ഫ്ലാഷ്  ന്യൂസ്‌

കൊടും ഭീകരന്‍  പിടിയില്.

സൃഷ്ടിവാദം

ഒരു നാള്‍ യുക്തിവാദി ദൈവത്തെ

നേരിട്ട്  കണ്ടു

സൃഷ്ട്ടിവാദം  മണ്ടത്തരമെന്നു

ശക്തിയുക്തം വാദിച്ചു

പോരാന്‍ നേരം ഒരു  നിര്‍ദേശവും കൊടുത്തു

ഗൂഗിളില്‍ സെര്‍ച്ച്  ചെയ്തു  നോക്കാന്‍.

വിശപ്പ്‌

ദാരിദ്ര്യം                       

എല്ലാം നല്കിയവ നുമുണ്ടത്രേ  ദാരിദ്ര്യം 

ഞങ്ങളവന്റെ  ദാരിദ്ര്യമകറ്റാന്‍  
ഒരുപായവും   കണ്ടെത്തി 

ചില്ലിത്തുട്ടിനും  വിലപിടിച്ച  ലോഹങ്ങള്‍ക്കും  മീതെ

അവനെ ഞങ്ങളടയിരുത്തി.

വിശപ്പ്‌

വിശപ്പ്  സഹിക്ക വയ്യാതെ  മണ്‍കലം

അടുപ്പില്‍  കയറിയിരുന്നു  വെറുതെ  തിളച്ചു

എന്നിട്ടും   കലം  വറ്റിപ്പോകാത്ത  വാര്‍ത്ത

ജനം അത്ഭുതത്തോടെയാണ്  വായിച്ചു  തീര്‍ത്തത്

കലം നിറയെ  കണ്ണീരായിരുന്നു  എന്ന

വാര്‍ത്തമാത്രം ആരും  വായിച്ചില്ല.